საქართველოს პრეზიდენტმა ევროპის საკონსტიტუციო სასამართლოების კონგრესის მონაწილეებისათვის მიღება გამართა
საქართველოს პრეზიდენტის სახელით დღეს ბათუმში ევროპის საკონსტიტუციო სასამართლოების XVII კონგრესის მონაწილეებისათვის მიღება გაიმართა. მიღებაზე გიორგი მარგველაშვილი საქართველოს საკონსტიტუციო სასამართლოს ყოფილ და მოქმედ თავმჯდომარეებთან ერთად მივიდა და 40 -მდე ევროპული ქვეყნის საკონსტიტუციო სასამართლოების თავმჯდომარეებს მისასალმებელი სიტყვით მიმართა.საქართველოს პრეზიდენტმა საკონსტიტუციო სასამართლოს როლზე და ერთიანი ევროპული დისკუსიის მნიშვნელობაზე გაამახვილა ყურადღება.
გიორგი მარგველაშვილის განცხადებით, საქართველო ამაყია იმით, რომ ბოლო სამი წლის განმავლობაში ევროპის საკონსტიტუციო სასამართლოების კონფერენციის თავმჯდომარე ქვეყანაა.
“ეს მაღალი სტატუსი ბუნებრივია, გამომდინარეობს იმ ადამიანების შრომიდან, რომელთა გადაწყვეტილებები და ერთგულება კონსტიტუციური სამართლის, დემოკრატიული მმართველობის პრინციპებისადმი და ადამიანის უფლებადაცვითი საქმიანობისადმი შესაბამისად შეფასდა მათი ევროპელი კოლეგების მიერ.
დღეს თქვენგანის პროფესიონალიზმითა და საქმისადმი ერთგულებიდან გამომდინარე საქართველო კიდევ ერთხელ ზეიმობს თავის ადგილს და როლს ევროპულ სამართლებრივ პროცესში.
პატივცემულო სტუმრებო, ჩვენ ერთად ვიმყოფებით ძალიან მნიშვნელოვან დროს, როდესაც ჩვენს საზოგადოებებში ევროპული ღირებულებების, ევროპული სამართლის უზენაესობის კონცეფციის, ადამიანის უფლებების პრევალირების საკითხებთან დაკავშირებით ცხოველი დისკუსია მიმდინარეობს.
ამ თვალსაზრისით, სწორედ საქართველოში ყოფნა მნიშვნელოვანი გზავნილია. საქართველო ერთერთი ყველაზე ევროოპტიმისტი ქვეყანაა. საქართველო არის ქვეყანა, სადაც სჯერათ ევროპული ღირებულებების და მიისწრაფვის ევროპული დემოკრატიის, ევროპული სახელმწიფოებრიობისა და ევროპული სამართლისაკენ.
ამ თვალსაზრისით, მომავალი თქვენი სამუშაო, ის დასკვნები და შედეგები, რომლებსაც თქვენ საზოგადოებას გაუზიარებთ, ძალიან მნიშვნელოვანია ჩემი ქვეყნისა და მისი მომავლისთვის.
ის დებატები, რომლებიც მიმდინარეობს ევროპულ სივრცეში აუცილებლად გულისხმობს, რიგ შემთხვევებში, კითხვის ნიშნის ქვეშ დაყენებას იმისა, რასაც კონსტიტუციონალიზმის, კონსტიტუციური სამართლის ევროპული სტანდარტი ჰქვია.
ამ თვალსაზრისით, თქვენგან მტკიცე პოზიციის დაკავება საქართველოსთვის და ევროპული ცივილიზაციისათვის ძალიან მნიშვნელოვანია”, - მიმართა გიორგი მარგველაშვილმა საერთაშორისო კონგრესის მონაწილეებს.
ევროპის საკონსტიტუციო სასამართლოების XVII კონგრესი, რომელიც კონსტიტუციური პრინციპების დაცვასა და გამოყენებაში საკონსტიტუციო სასამართლოების როლს ეხება, ბათუმში, ხვალ გაიხსნება და მასში მონაწილეობას საქართველოს პრეზიდენტი, პრემიერი და პარლამენტის თავმჯდომარე, ევროკავშირის ელჩი საქართველოში, დიპლომატიური კორპუსის წარმომადგენლები, საქართველოს საკანონმდებლო, სასამართლო და აღმასრულებელი ხელისუფლების წევრები მიიღებენ.
კონფერენციაში მონაწილეობას მიიღებს ასევე, ევროპის საბჭოს ვენეციის კომისიის პრეზიდენტი ჯანი ბუკიკიო, რომელსაც საქართველოს პრეზიდენტი გიორგი მარგველაშვილი ხვალ შეხვდება.
